የጠዋቷ ፍቅር የመውደድ ጤዛዋ

ረፈድፈድ አድርጋ ጠፋች ከደብዛዋ

አገር ሰላም ብዬ መውደድን አቅፌ

ፍቅር ተመችቶኝ ስፈግ በንቅልፌ

መቼ ዋዛ ሆና የመውደዴ ሌባ

ፈትለክ ብላ ጠፋች ፍቅሬን ተከናንባ

መውደዴ ሌባዋ ፍቅሬን ነጥቃ ሄደች

ኑሮ ትምርት ብላ ካለፎርኒያ ገባች

ልቤ በሩን ዘጋው ለፍቅር ለመውደድ

ሊያገግም ሊያስታምም ስብራቱን በደንብ

መውደድ ያፋፋው ልብ ችግር ያልደፈረው

ፍቅሩን ሲነጠቅ ቆሳስሎ አረፈው

መውደዴ የት ሄደ ከጠየቀች ምንአልባት

መውደድ ገደል ገባ ብላችሁ ንገሯት

የመውደድ ድሪቶ በቤቴ ተለብሶ

የፍቅረ ቡቱቶ በወረት በስብሶ

ዕራቁት አስቀረኝ ፍቅርም በኔ ብሶ

ድሪቶም በቦታው ቡቱቶም በቦታው

ሰብስቤ ለገደል እንዲያው ጥቅም የለው

መውደዴ የት ሄደ ከጠየቀች ምንአለባት

ፍቅር ገደል ገባ ብላችሁ ንገሯት

እንደልማዳቸው አበው ሲተርቱ

ሁሉም ይመለሳል ወደ መሰረቱ

የወጣም ይወርዳል የመጣም ይሄዳል

የጣፈጠም ሲመር

የላላው ሲከርር

ዛሬ የተጠላው በሁዋላ ሲፈቀር

የታመመው ሲድን ህመሙ ሲሰበር

ላጤውም ሌጣውን ሌላውም ከሚስቱ

እንደልማዳቸው አበው ሲተርቱ

ሁሉም ይመለሳል ወደ መሰረቱ፤ ፤

መውደዴ የት ሄደ ከጠየቀች ምንአልባት

መውደድ ገደል ገባ ብላችሁ ንገሯት፤ ፤