አቤቱ አምላኬ እንዴት ፈጥረሃታል

አቆነጃጅተሃት አሳምረሃታል

ያይኖቿ ማማር የከንፈሯ ውበት

ያፍንጫዋ መርዘም የጉንጮቿ ፖምነት

የቅርጧ መጠረብ የጠጉሯ ዞማነት

በፍጥረት አለሙ ያላት አስተያየት

ያላት እርጋታና ለዛ ቀልደኛነት

ድምጠ መልካምና መረዋ አንደበት

አቤቱ አምላኬ እነዴት ፈጥረሃታል

አቆነጃጅተሃት አሳምረሃታል

አምላኬ ጊዜውን ያጠፋባት ቆንጆ

በጣሙን ታምራለች ደግሞም ታሳሳለች

ስራዋን አክባሪ ሰውነ ትወዳለች

ወዲያ ወዲህ ስትል ለስራ ተፍ ተፍ

አዳሜ ጎረምሳ አብሯት ሲንሰፈሰፍ

እሷ ግን ስራዋን ታሰላስላለች

ለሁሉም ጊዜ አለው ብላ እያሰበች

ለሚጎነትላት ይህንኑ እያለች

አቤቱ አምላኬ እንዴት ፈጥረሃታል

አቆነጃጅተሃት አሳምረሃታል

እንከን አይወጣላት ላለባበሷ

ስትራመድ እንኳን ጠጉርዋን መነስነሷ

ስታወራ ስትስቅ ስትፈለቅቅ ጥርሷን

ዐይኗንም ስልምልም ደግሞም ጨፈን ከደን

የክፍል ፕሬዚዳንት ተብላ ተሹማለች

ሙያተኛ ተብላ ስምም ተሰጥታለች

ትምህርቷን በሙሉ በመቶ አልፋለች

ያመቱ ኮኮብም ተብላ ተጠርታለች

ምስጉን ሰራተኛ ሆና በስራዋ

ሽልማት አግኝታ ለጥሩ ሙያዋ

የጓደኞች ውጤት ብላ በትህትናዋ

ዕድሜ ለናንተ ነው ለባልደረቦችዋ

አቤቱ አምላኬ እነዴት ፈጥረሃታል

አቆነጃጅተሃት አሳምረሃታል

ስድስት ወራት ሙሉ ተመልክቻታለሁ

በጥሩ ፈገግታ ሰላም ብያታለሁ

ሳልፍም ሳገድም አሳስቄያታለሁ

በቡና ዕረፍቴም አዋርቻታለሁ

ለሻይ ምሳ ግብዣ አግደርድሬያታለሁ

አቤቱ አምላኬ እንዴት ፈጥረሃታል

አቆነጃጅተሃት አሳምረሃታል

ሁኔታዋን ሳየው በደንብ ወዳኛለች

ከሌሎቹ ሁሉ እኔን አቅርባለች

እንደመሰለኝም ልቧን ሰጥታኛለች

ልብሽን ውሰጂው ስጪኝ ስልክሺን

በማለት ጠየኳት ቆንጂት እባክሺን

ሌላ ሌላ ነገር ግድ የለም ይሁን

ለስልክ አላገኝም ፈቃድ የባሌን

ብላኝ አረፈቺው የኔዋ ቆነጂት

የሰው ጥጌሬዳ የሰው እመቤት፤ ፤