የትናንቷ ውዴ ፍቅሬ አለኝታዬ

የዛሬ ባዳዋ የሩቅ እንግዳዬ

የነገ ትዝታ ህልምና ቅዠቴ

እርሺኝ ረሳሁሽ የታሪክ ትዝብቴ

እኔ ትላንትናን አንቺ ዛሬን ሆነሽ

ነገ ሊያመልጠን ነው አላስታውስ ብለሽ

የትላንት አበባ ፍቅር ንጥህና

አላየሽም አንቺ የዛሬ ግድግዳ ሸፍኖሻልና

የትናንት ቡቃያ ለዛሬ ፍቅር ነው

ለነገ አበባ የቤት ማስጌጫ ነው

የቡቃያው ጌሾ ዛሬ በሰበሰ

የፍቅር ቅራሪው ተከላለሰ

የትዝታ እሳት በልቤ ተዳፍኖ

አይኔንም ሸፈነው የፍቅር ጭስ ሆኖ

ዛሬም አልወጣ አልኩኝ ሰንፌ በጣሙን

ከትናንትና ወዲያ ፍቅር ብዬ ለምን

ነገማ ጨለመ ምንም አይታየኝ

ዙሪያው ገደል ሆኖ ተደነጋገረኝ

በሽታም ህመሜም ቁርጥማቴም ሆነሽ

ያለ ምንም ምክነያት ዱታ ነኝ ማለትሽ

ሰማሽ ወይ የኔ ሆድ ሰሚ ለኔ ብለሽ

የትላንቷ ፍቅሬ ዛሬ ስታዘብሽ

አጃኢብ ሞኝነት ለካ አንቺም ሰው ነሽ

ፍቅሬ ሆይ ይመችሽ ተደላደይበት

ካሁን ወዲያ አይኔም ሌላዋን ይይበት

አንቺ ለኔ አልሆንሽም እኔስ ምን ጨነቀኝ

ለፍቅር ብዬ እንጂ ያንቺ እዳ የለብኝ

አልመስለኝ ብሎ ነው ፍቅር ካንቺ ሌላ

መሞኘቴን ሁሉ ያወቅሁት በሁዋላ

ዛሬማ እንግዲህ ዐይኔን ከፍቻለሁ

ዕድሜ ለጓደኞች ፍቅርነ አግኝቻለሁ

ወድጄሽ ነበረ አምልኬሽ ተጃጃልኩ

ጠባይሽን አድንቄ ሰውነትሽን ረሳሁ

ጥሩ ህልም ነበርሽ ከንቅልፌ ነቃሁ

ሰማሽ ወይ ቅድስቴ ስሚ ለኔ ብለሽ

ያለ ምንም ምክንያት ዱታ ነኝ ማለትሽ

ለኔም ግራ ገባኝ ሰሚውም ጉድ አለሽ

ልቤም ዘንግቶሻል አንቺን እንዳላለሽ

አጃኢብ ሞኝነት ለካ አነቺም ሰው ነሽ፤ ፤